Mat 5 | MMX | STEP | Iesu ga ven nedi buaang limixin la ni ga urut upana at lakaana, ni ga xis kopok, la diga xis to melamgo ren,

Matthew 5

Iesu Ga Vavang Ti Limixin To Vana At Lakaana

(Lu 6:20-23)

1 Iesu ga ven nedi buaang limixin la ni ga urut upana at lakaana, ni ga xis kopok, la diga xis to melamgo ren, 2 la neni ga ru ka i do na anasa di.

3 Iesu ga lok keretna, “Luvukat mo ik lok tinedi dikleklen i do labaroonan atdi ik pakes ti ne Moroa, mila limixin erepmo dinaba vubeles at Linintoo no vana at laxalibet. 4 Luvukat mo ik lok tinedi mo dik lok bukbulu mila laxakapmek i umsu at na lavatbung menemen, ketla ne Moroa naba lox amenemen nedi! 5 Luvukat mo ik lok tinedi dik lox asi di, mila ne Moroa naba raba di mi lixitkis to xeneng at Linintoo ren. 6 Luvukat mo ik lok tinedi di ngaongao ri loklok mokmokso, mila ne Moroa naba lox epovo mo lavavara atdi. 7 Luvukat mo ik lok tinedi di lox asuusu lebelemumu ri limixin, mila ne Moroa naba lox asuusu lebelemumu rinedi. 8 Luvukat mo ik lok tinedi lebelen nedi i dadat aleng mila dinaba ven ne Moroa. 9 Luvukat mo ik lok tinedi, di lok lumulum kantubu atnedi dit kis munepen, Moroa naba so asen nedi do luvutnitna. 10 Luvukat mo ik lok tinedi dip kip levesongsongot mumu loklok mokmokso at ne Moroa, mila diba ruuna ka lixitkis to xeneng at Linintoo no vana at laxalibet.

11 Luvukat mo ik lok tinemi do limixin diba vaase aksaksa rinimi la diba sev asongot nimi la diba paase mumu nimi mi levelinga xaxarang mila nemi limixin tarak. 12 Do dina lox i xuren, mina momo la mina sosoro, mila langsangan luunun miba ruuna ka i ro vana at laxalibet. Limixin kakapmek me gano diga lox asongot lavaeme vapaase alii no diga rooro gano. La kerepmo limixin kakapmek diba lox asongot bok nimi.”

Limixin At Ne Iesu Di Lok Ngan Laxakures La Laxasep

(Mk 9:50; Lu 14:34-35)

13 La ne Iesu ga lok bok tidi, “Nemi mi ngan laxakures ti limixin axap. Ket do lololos at laxakures na xap, kopmen bok ba tangas kusu naba so kakures manga. Kopmen bok ba na epovo xusu dina lok li i at teveluxa, kuren la diba lu xape mun min la limixin dibat pas abilinga i.

14 Nemi mi ngan laxasep ti limixin at na lavatbung menemen. Lemenemen silok do it kis to mavana at lakaana kopmen na epovo do na lipe. 15 Kopmen teta na sox aros lababao xusu na lok li i ro maxopok at lavatbaaket; ketla neni i lok li i ro at lenep kasep, kusu laxasep teren naba so epeseves tinedi axap go xeneng at loogu. 16 La kerepmo bok laxasep atnemi na soso ro melamgo at limixin, kusu diba reven leveloklok nunuan mik lox i, la diba emi asu mi ne Moroa ne Temen nimi boro vana at laxalibet.”

Iesu Ga Paase Mi Lenavolo At Ne Moses

17 La ne Iesu ga lok bok tidi, “Nemen gat mita nua i do aga vot kusu ana lok pes Lenavolo at ne Moses la levenanasa at lavaeme vapaase alii. A goxo vot kusu ana lok pes i, ketla aga vot ti lox epovo levelinga ren. 18 A tong tuturun i rinimi.Laxalibet mi lavatbung menemen naba nemen at laxanaleng solo, la ap mo levenaleng kopmen tamangkot lixilik at levelinga keneng at Lenavolo naba xap asonao, i se ap mo laaleng levelinga ren naba sorun. 19 Kuren la, do tara i los polo tamangkot lixilik at Lenavolo, la ia lox ase lentaba vetpes do dina los polo box i, neni naba lixilik tinotno at Linintoo no vana at laxalibet. Do tara i ronga res at Lenavolo, la ira lox ase bok lentaba vetpes kusu dina ronga res teren, neni naba silok to at Linintoo no vana at laxalibet. 20 A tong i rinimi. Mo do luruptuvuk atnimi noxo lox avukat ti luruptuvuk at luvuttadi loklox ase at Lenavolo la lubung Parisi, kopmen mi noxo vubeles at Linintoo, no vana at laxalibet.”

Iesu Ga Paase Mumu Lumukmusak

21 La ne Iesu ga lok bok, “Miga ronga i do lavalabat atdik gano migomgo diga tong i do, ‘Nemen gat mitap sev amet tadi; la do nege i sev amet taradi, neni naba tu at lavapaase ro melamgo at laradi rongtonga linga.’ 22 Ketla mo nga ana tong i rinimi do, nege i musak mene neton, neni naba tu at lavapaase ro melamgo at laradi rongtonga linga; la do nege i tong i ri neton do ‘Nenu laradi pis,’ neni naba tu at lavapaase ro melamgo at lixitkis buru at lavanuti sangaun nedi loxongkulao silok at limixin me Israel; la do nege i lok ti neton do ‘nenu lavanga baulang’, i auret do ne Moroa naba riki i uto xeneng at laxao at lemenemen songsongot.

23 Kuren la, do unat pas kusu una raba letaba ram ti ne Moroa ro at loxonin laplavang, la go ura doma su at netam i emusak minu, 24 una ke xepe be letaba ram go melamgo at loxonin laplavang; la unat pas avot be xusu una lok lumulum eburu mi netam; la melemu ba unamlong la una raba letaba ram ti ne Moroa.

25 Mo do tara na lok ka u ri lavapaase kusu na lok li lumumuat taram, una etangas nunuan min at langa kusu una lok lumulum eburu min. Do kopmen, neni naba lok ka u uto at laradi rongtonga linga, la laradi rongtonga linga naba lok li u at laradi rutu mu; la ni naba lok li u at loxokoxo. 26 Nia a tong tuturun i do ubak lok go, naba se rinotno do una un axap lempilas at nom lavapaase.”

Loklok Ti Elongka Mi Latkin At Lara Vetpes

27 La ne Iesu ga lok bok tidi, “Miga ronga vam lavapaase diga tong i do, ‘Nemen gat mita elongka mi lavakin at lentaba vetpes.’ 28 Ketla mo nga ana tong i rinimi, do tara na ven peves at tatkin petpes, i lok ngan neni ia longka vam mi nom latkin to xeneng at lebelen. 29 Do laxatli tino ram na lox u la una subu, una lik gogo su min. I lox avukat tu do una lok pes tenep at labantuxu ram; lavanga labantuxu axap taram nat pas ti lemenemen songsongot. 30 Mo do lakngam tino na lox u la una lok laxakapmek, una ra korop pes i la una lu min! I lox avukat tu do una lok pes lara lakngam; lavanga labantuxu axap taram nat pas ti lemenemen songsongot.”

Loklok Ti Ba Korop Epot

(Mt 19:9; Mk 10:11-12; Lu 16:18)

31 La ne Iesu ga lok bok tidi, “Gano diga lox ase bok limixin keretna; taradi do na soxope latkin teren, ni na malagan taba i mi tevelinga axasep do neni mo na ba korop ta leepot atdu. 32 Ketla mo nga ana tong i rinimi do; mo do taradi na soxope latkin teren, ketla mo latkin goxo longka, mo laradi i lok latkin teren ira longka, mo do neni ira epot manga at taradi vetpes; la mo laradi bok i epot ka mo latkin, i longka vam mila ik midi eburu mi latkin at laradi vetpes.”

Lavapaase Mumu Loklok Ting Pangpe

33 La ne Iesu ga lok bok tidi, “Miga ronga bok pam i do diga tong i ri limixin gano do, ‘Nemen mita los polo lavangpangpe atnemi saparap ne Moroa, ketla mina lox epovo lempanga salai mira xaape vam min.’ 34 Ketla mo nga ana tong i rinimi do; nemen gat mita lok lavangpangpe mi laasen at ne Moroa; nemen mita lox amuat tevelinga mi lavangpangpe atnimi la mina tong laxalibet, mila neni loxonin orong at ne Moroa. 35 La nemen mita lox amuat tevelinga atnimi mi lavangpangpe mi lavatbung menemen, mila neni loxot burubut at luxangkedek teren; la nemen mita lox amuat tevelinga mi lavangpangpe mi ne Jerusalem, mila neni lemenemen silok at ne Moroa. 36 Nemen mita lox amuat tevelinga vangpangpe mi lengkabinim at lempatlak atnimi mila nemi xa mixo epovo xusu miba lok tamang kabinim at lempatlak atnimi nan bun kopla na bibi. 37 Mina tong mene i do, ‘I ruturun!’ kopla ‘Kopmen!’ Toxolinga bok tara na tong i mavana at nai, i laa boro at ne Satan.”

Loklok Ti Porang Amlong Leveloklok At Taradi

(Lu 6:29-30)

38 La ne Iesu ga lok bok tidi, “Miga ronga bok pam i diga tong i do, ‘Mo do una lik su mi laxatli at tara, laxatli bok taram diba lik su min; la do una sep pit tasangsa at tara, lasangsa bok taram diba rit pir i.’ 39 Ketla mo nga ana tong i rinimi do; nemen mita vorang amlong laxakapmek at tara do i lox i ru. Mo do tara na vasa lavapaales tino ram, una ke box i na vasa lavapaales piang taram. 40 La do tara na lok ka u ri lavapaase kusu na li levelinga mumuat mavana ram mumu lavanga singsiga ram, una ke raba box i mi lavanga singsiga silok taram. 41 La do tara at limixin esep na pu soso u do una xip laknixip teren uto vaxalom, unap kiv i uto vaxalom axa. 42 Mo do tara na sing u mi tavanga, una raba i min; la mo do tara i vara i do na lok ka be tavanga ram kusu na gugu min, una siam taba i min.”

Iesu Ga Anasa Limixin Mi Langas Ti Balamu Lavamunepen

(Lu 6:27-28, 32-36)

43 La ne Iesu ga lok bok tidi, “Miga ronga bok pam i, diga tong i do, ‘Mina balamu larapen tangas atnimi, la** mina lox angtungun tidi di munepen minimi.’ 44 Ketla mo nga ana tong i rinimi do; mina balamu nedi di munepen minimi, la mina ngising tinedi dik lox asongot nimi, 45 kusu miba ravasu ngan luvutnitna rinotno at ne Temen nemi ne Moroa no vana at laxalibet, mila neni ga lok laxangking kusu na soso mavana at limixin kapmek i ngan mun tinedi bok limixin nunuan; la im taba bok lentakabu ridi dik lok lununuan la tidi bok dik lok laxakapmek. 46 Mo do nemi xa mi balamu xusuk mun nedi di balamu nimi, ne Moroa xopmen noxo raba nimi mi luunun. Limixin kapmek kerekngan luvuttadi loklok ka pilas bok dik lox i na. 47 La mo do mi paase momo mun ti luvutneton nimi, na loklok kopmen lavanga silok, mila luvuttadi dixo nuunu at ne Moroa di mumu asu box i na. 48 Kuren la mina nemen manmanton kerekngan mun ne Temen nemi no vana at laxalibet in manton.”